ភ្នំពេញ៖ សាលាដំបូងរាជធានីភ្នំពេញ នាថ្ងៃទី២៧ ខែកុម្ភៈ ឆ្នាំ២០២៤ បានបំភ្លឺថា តុលាការពុំមានការដោះលែងជនបង្កដែលបើករថយន្តបុកមនុស្សស្លាប់ ៤នាក់ និងរបួស ៤នាក់នៅក្រោមស្ពានអាកាសឫស្សីកែវ ដូចតាមការផ្សព្វផ្សាយរបស់គេហទំព័រដីថ្មី PDT-News និងបណ្តាញសង្គមនានាថាបានដោះលែងជនបង្ក និងចូលបម្រើការងារជាធម្មតាវិញនោះទេ។

តាមសេចក្តីថ្លែងការណ៍របស់សាលាដំបូងរាជធានីភ្នំពេញ តាមខ្លឹមសារដែលផ្សាយរបស់គេហទំព័រ និងបណ្តាញសង្គមនានា គឺជាព័ត៌មានមិនពិតដែលធ្វើឱ្យសាធារណជនមានការយល់ច្រឡំ និងប៉ះពាល់ដល់នីតិវិធីចំណាត់ការសំណុំរឿងរបស់ស្ថាប័នតុលាការ។

សាលាដំបូងរាជធានីភ្នំពេញអះអាងថា បច្ចុប្បន្ននេះជនបង្កត្រូវបានឃុំខ្លួនបណ្តោះអាសន្នក្នុងពន្ធនាគាររាជធានីភ្នំពេញ។ សាលាដំបូងរាជធានីភ្នំពេញបានតម្រូវឱ្យគេហទំព័រខាងលើ និងបណ្តាញសង្គមនានា កែតម្រូវខ្លឹមសារដែលផ្សព្វផ្សាយ បើមិនដូច្នោះទេសាលាដំបូងរាជធានីភ្នំពេញនឹងមានចំណាត់ការតាមនីតិវិធីច្បាប់។

គួររំលឹកថាហេតុការណ៍គ្រោះថ្នាក់ចរាចរណ៍បណ្តាលឱ្យយុវជនចំនួន ៤នាក់ស្លាប់នៅក្រោមស្ពានអាកាសឫស្សីកែវ បានកើតឡើងនៅយប់ថ្ងៃទី២០ ខែមករា ឆ្នាំ២០២៤៕